Gazel 117

Metin: 
Bana bâd-i saba ol serv-i gül ruhtan haber vermez
Açılmaz gonce-i bahtım ümîdim nahli ber vermez
Döküp göz yaşını sensiz helâkim isterim ammâ
Ecel peykine seyl-i eşk gird-âbı güzer vermez
Gözümde mesken et hâr-i müjemden ihtirâz etme
Gül-i handâna her dem hâr yâr olmak zarar vermez
Eger cân almak istersen tenimden tîğini kesme
Ki pejmürde nihâle vermeyince su semer vermez
Kıyâs et şem’den vehm eyle çerhin inkilâbından
Kim ol baş almağa kasd etmeyince tâc-i zer vermez
Belâ zımnında râhat olduğun izhâr eder halka
Felek bî-hude hâr-i huşkten gül-berg-i ter vermez
Fuzûlî dehrden kâm almak olmaz olmadan giryân
Sadef su almayınca ebr-i nîsandan güher vermez
Vezin: 
Mefâîlün Mefâîlün Mefâîlün Mefâîlün
Osmanlıca: 
بكا باد صبا اول سرو كلرخدن خبر ویرمز
آچلمز غنچهٔ بختم امیدم نخلی بر ویرمز

دوكوب كوز یاشنی سنسز هلاكم استرم اما
اجل پیكینه سیل اشك كردابی كذر ویرمز

كوزمده مسكن ایت خار مژەمدن احتراز ایتمه
كل خندانه صوردم خاره یار اولمق ضرر ویرمز

اكر جان آلمق استرسن تنمدن تیغكی كسمه
كه پژمرده نهاله ویرمینجه صو ثمر ویرمز

قیاس ایت شمعدن وهم ایله چرخك انقلابندن
كیم اول باش آلمغه قصد ایتمینجه تاج زر ویرمز

بلا ضمننده راحت اولدغن اظهار ایدر خلقه
فلك بیهوده خار خشكدن كلبرك تر ویرمز

فضولی دهردن كام المق اولمز اولمدن كریان
صدف صو المینجه ابر نیساندن كهر ویرمز


Mana badi-seba ol servi-gülrühden heber vermez,
Açılmaz könçeyi-behtim, ümidim nehli ber vermez. 
Töküb göz yaşını sensiz helakim isterem, emma
Ecel peykine seyli-eşk girdabi güzer vermez. 
Gözümde mesken et, hari-müjemden ehtiraz etme,
Güli-hendane sordum, hare yar olmak zerer vermez. 
Eger can almak istersen, tenimden ohunu kesme
Ki, pejmürde nihale vermeyince su semer vermez. 
Kiyas et şem’den, vehm eyle çerhin inkilabından
Kim, ol baş almağa kesd etmeyince taci-zer vermez. 
Bela zimninde rahet olduğun izhar eder helke
Felek, bihude hari-hüşkden gülbergi-ter vermez. 
Füzuli, dehrden kam almak olmaz olmadan giryan,
Sedef su almayınca ebri-nisandan güher vermez.